BALEI BA DONKAM BAN PYNNEH IA KA KHYNDEW BAD KA UM?
Ka khyndew bad ka um ki long ki khuiň mariang kiba donkam eh na ka bynta baroh ki kynja ba im ha sla pyrthei.
Nature's scar forever ..... Land slip due to intensive bun cultivation |
Ka khyndew nalor ba ka ai ia ka bam, ki diengthang bad ki jingbam ia ki jingri ka kyrshan ruh ia ka jingim briew bad ka ioh ka kot jong ki. Pynban ka la don ka jingpynduh ba khlem sangeh ia ka da kiba bun ki rukom kum ka jinghap bad tuid noh ka khyndew, ka jingpynduh ia ki khlaw ki btap, ka jingtih madei mata ia ki mar poh khyndew, ka jingpynbam phlang kyrni ha ki pyntha bad ka jingbym nang ban pyndonkam bad pynneh ia ka. Kine baroh ki la pynlong ia ka khyndew ba kan duh noh ia ka bor jong ka bad kumjuh ia ka jinglah jong ka ban pynbiang ia ka jingdonkam sboh jong ki jingthung jingtep.
|
Ka shim por ia ka mariang 600 haduh 1000 snem ban tei 2.5 cm. ka dewsboh (topsoil) hynrei ia kane pat ka shim por tang shisnem ban pynduh da ka jingpyndonkam bakla ia ka. Ki kaiphot ki iathuh ba haduh 6000 million ton ka dewsboh ka duh noh man ka snem na kumba 80 million hectare ka jaka tang ha India. La pynshisha ruh ba ka jingshah rong noh ka khyndew na ki jaka bym don jingiada ka long 120 ton na ka shi hectare shisnem shisnem bad kane ka lah ban kiew sha ka 300 ton na ka shi hectare ha ka shisnem.
|
Ka jingduh noh ka 'dewsboh bad ka jingshah rong ka khyndew ka wanrah ia ka jingtuid lehnohei jong ka umslap bad ka jingbym lah shuh ka khyndew ban kjit bad bat ia ka um hapoh jong ka. Nalor kata, ka pynduh ruh ia ka sboh na ka bynta ki jingthung jingtep, ka jingdap khyndew bad shyiap jong ki pung um bad ki wah kaba pynlong ia ki wah ba kin shlei bad pynjot ia ki jingrep, ki mrad ki mreng, ki jaka shong briew, ki lynti syngkien bad kumta terter. Hynrei kaba kongsan eh na kine ka long ka jingktah ia ka rep ka riang, ia ki jingpynmih mar khlaw bad ia ka jingioh ia ka um kaba biang na ka bynta ban ring um rep bad kumjuh ia ka umbam umdih. |
Severe soil erosion due to unscientific stone quarrying and faulty cultivation in the hill slopes |